SARI-SARING SINENG PINOY

Biyaya Ng Lupa

Magbubukas ang Biyaya Ng Lupa (LVN Pictures, Inc.) sa pagdiriwang ng kasal nina Jose (Tony Santos) at Maria (Rosa Rosal). Nagmistulang piging ang buong bayan ng Santa Monica sa okasyong ito. Nagsipagtugtugan ang mga musikero, nagsipagsayawan ang mga dalaga't binata at abala ang mga panauhin ng bagong kasal. Ihahatid ng karitong hila ng kalabaw na napapalamutian ng bulaklak at dahon sina Jose at Maria sa bahay ng kanilang mga magulang upang tumanggap ng basbas. Sumunod na araw ay dinalaw ng dalawa ang kanilang magiging bagong tahanan bilang mag-asawa. Doon din ipapakita ni Jose ang mga punla ng lansones na ipinamana ng kanyang ama. Babanggitin ni Maria na dalawampung taon ang kanilang hihintayin bago mamunga ang mga ito. Hindi alintana ni Jose ang mahabang panahon, ang mahalaga ay pursigido siyang asamin ang araw na mamumunga ang kanilang mag lansones. Itatanim ng dalawa ang mga punla sa lilim ng mga punong niyog sa paligid ng kanilang bahay. Iniintindi rin ni Jose ang kanilang munting lupain. Iluluwal ni Maria ang kanilang panganay, si Miguel (Leroy Salvador), isang pipi at bingi. Sumunod si Arturo (Carlos Padilla, Jr.) at si Angelita (Marita Zobel). Mamamatay ang kanilang sanggol na nagngangalang Carmen. Si Lito (Danilo Jurado) ang kanilang bunso. Magpapatuloy ang masalimuot na buhay ng mag-anak hanggang sa mamukadkad ang mga bulaklak ng lansones. Matatapos ang pelikula sa pag-ani. Tutulungan ng buong bayan ang mag-anak na pitasin ang mga bunga sa puno at ilagay sa mga kaing.  Sa huli, makikitang umiiyak si Maria, hinahaplos ang araro, sabay dakot ng lupa.

Masasabing matagumpay ang pelikula sa pakay nitong isalunan ang hilahil ng mag-anak sa usapin ng lupa at pag-angkin nito ng mga komprador. Idagdag pa rito ang samu't-saring puwersang humahamon sa mga mithiin ng pamilya nina Jose at Maria. Matutukoy ang paghulma sa taumbayan bilang karakter at hindi lamang kasangkapan. Sila'y aktibong kumikilos sa pagsulong sa mga partikular na interes. Sa pag-usisa nito sa mga panlipunang isyu, natatanganan din ng pelikula ang usapin ng kasarian sa konteksto ng bahay at bukid. Ang pag-aararo at pagpapalaki ng mga bata. Bakit ang mga lalaki lamang ang maaaring bumungkal ng lupa? At bakit hindi ikinatutuwa ni Maria na pinaghihiasukan ni Jose ang pagdidisiplina sa mga bata? Gayunpaman, naipamalas din ng pelikula na ang mga nakamihasnang papel na itinalaga sa mga lalaki at babae ay natitinag din ng sitwasyon at kondisyong historikal. Halimbawa, naitaguyod din naman ni Maria ang kanyang mag-anak kahit wala ang kanyang bana. Susi sa temang ito ang maningning na pagganap ni Rosa Rosal bilang Maria. Nagpapamalas siya ng tatag ng kalooban, kahinahunan at marubdob na pag-ibig sa pamilya at magandang kinabukasan nito. Nasaling ng pelikula ang pinagpiptagang imahe ng pamilya bilang institusyon. Sinasabi ng pelikula na hindi naman abstrakto ang konsepto ng pamilya  o pati na rin ang banal na tradisyon ng kasal. Ito ay isang praktika na isinasabuhay sa konteksto ng mga espesipikong kondisyon. Nariyan ang pulitika ng pagtangi sa mga anak o ang isyung kung sino ang higit na nakalalamang sa puso ng mga magulang. Bagman hindi nagawa ng pelikulang pawiin ang lahat ng pait ng tradisyon ng melodrama, nakayanan naman nitong maghain ng bagong panlasa sa pagkonteksto ng domestikong usapin sa uniberso ng kontradiksiyong panlipunan.

Direksiyon: Manuel Silos
Dulang Pampelikula: Celso Al Carunungan At Pablo Naval
Sinematograpiya: Remigio Young
Musika: Juan Silos, Jr.
Editing: Enrique Jarlego
Disenyo: Teddy Carmona
Produksiyon: LVN Pictures, Inc.
Release Date: December 16, 1959