SARI-SARING SINENG PINOY

Sugar Daddy

Malakas na puwersa naman talaga ang pag-ibig. Nailalagay ang mangingibig sa komplikadong sitwasyon na malamang na hindi magagawa ng taong hindi umiibig. Sa romance mode ng mga kuwento sa Pilipinas, walang kamatayang puhunan ang temang ito. Sabi nga "hahamakin ang lahat, masunod ka lamang." Sa totoo lang, kumita na ito ngunit patuloy pa ring pinagkakakitaan. Sa pelikulang Sugar Daddy (Regal Films, Inc.), patuloy ang tradisyong ito ng pag-ibig na komplikado. May gaspang ang detalye ng pag-iibigan nina Dalena (Alma Moreno) at Jack (Ricky Belmonte) na nakakaakit panoorin. Pati ang nakababatang kapatid ni Dalena na si Elena (Cherie Gil) at inang si Ester (Anita Linda) ay may mga makatotohanang eksenang napakakaswal na nagpapakita ng relasyong malalim ang pinaghuhugutan. Sa yugtong hinog na hinog na ang anggulo ng pagmamahalan nina Jack at Dalena saka papasok ang mapait na bahagi ng kanyang pagiging bayarang babae . Hindi siya inosente tulad ng  superpisyal na naitanghal sa maraming eksena kundi pumapatol din sa kliyente. Sa madaling sabi, pumayag siyang maging kerida ni Rodolfo Rodriguez (Luis Gonzales). Lilitaw na patuloy na nagmahal at hindi lumimot si Jack. Kailangan niyang muling sumayaw sa pagkakataon. At siyempre nga dahil nakumpirma ang kanilang pagmamahalan, gagawin ang lahat upang muling magsama.

Sa kalahatan, dramatikong naitanghal ang mga posibilidad ng sitwasyong inilatag ng pelikula. Naipahayag sa lengguwaheng biswal ang mga taktikal na kuntsabahan, hidwaan at pigil na sagupaan ng mga tauhan. Ginamit ng Sugar Daddy ang tradisyong ito sa pagfokus sa pamilya at pag-ibig sa melodramatikong pamamaraan. Hindi makakailang nagtagumpay si Elwood Perez sa paggamit ng anyong ito upang palutangin nang may higit na katotohanan ang sitwasyon ng mga tauhan at mas malalim na pagdalumat sa humanidad ng mga karakter. Matalino ang paghimay sa iba't-ibang tensiyon ng emosyong kinakaharap ng mga tauhan, ang banghay ng istorya ay nakatutok hindi lamang sa mga pangyayari kundi higit na tumatalunton sa pagbibigay-humanidad sa katuturan ng pagkatao, nagagamit ang ibang elemento ng pelikula hindi lang bilang sangkap kundi daluyan sa pagpapakapal ng tekstura ng kuwento at katauhan ng mga karakter at walang idealistang paghahandog ng wakas. Ang kalakasan ng produksiyong ito ay ang pagbibigay ng matamang atensiyon sa komplikasyon ng pag-ibig at kung paano ito gumagapang at bumabalot sa pang-araw-araw na buhay.

Direksiyon: Elwood Perez
Dulang Pampelikula: Toto Belano
Sinematograpiya: Narciso Magcalas
Musika: Demet Velasquez
Editing: Ben Barcelon
Disenyo: Pedro Perez At Ray Maliuanag
Produksiyon: Regal Films, Inc.
Release Date: November 4, 1977