SARI-SARING SINENG PINOY

The Learning

Ang The Learning (CineDiaz, Inc.) ni Ramona Diaz ay isang dokumentaryo tungkol sa buhay nina Angel, Rhea, Grace at Dorotea, apat na gurong napiling magturo sa isang pampublikong paaralan sa Baltimore, Maryland. Sa pelikula, makikita natin ang kaibuturan ng buhay ng mga babaeng ito. Halata ang kanilang tiwala kay Diaz, kitang-kita ito sa napakalapit at napakalalim na pagpasok ni Diaz halimbawa, sa buhay ni Dorotea at ng kanyang pamilya sa Bogo City. Sinuklian naman ito ng respeto ni Diaz, hinayaan niyang magkuwento at magsalita si Dorotea at ang kanyang pamilya nang walang bahid na paghuhusga mula sa kamera at sa direktor. Hindi din hinayaan ni Diaz na magmistulang spektakulo ang kani-kanilang mga eksena sa loob ng silid-aralan. Makikita natin sa The Learning ang mapanuri ngunit sensitibong paggamit ni Diaz ng sining ng sine upang ipakita ang buhay ng mga babaeng guro habang isinisiwalat ang iba't-ibang isyu at problemang kaakibat ng pamumuhay sa ibang bansa. Bumabalot ang tema ng pagbabago sa pelikulang The Learning. Malaking pagbabago na tila rebolusyon, sa personal na lebel ay makikita sa buhay ni Angel. Sa pagpapalit ng eksena mula sa buhay ni Angel sa  Maynila hanggang sa pagtuturo nito sa Baltimore, epektibong ipinakita ni Diaz ang kapangyarihan ng pagbabagong buhay. Araw-araw, makikita ang paggawa ni Angel ng lesson plan upang mapaghandaan ng husto ang bagong hamong kakaharapin. Balot sa kahirapan ang pamilya ni Angel na pilit niyang binubuhay sa pagtatrabaho bilang guro. Si Angel ay mistulang anghel sa kanyang mga kaanak.

Mamamalas ang pinatalas na teknikal na kakayahan ni Diaz sa pagiging pulido ng The Learning sa aspeto ng sinematograpiya at disenyong biswal. Malinaw na naglatag ang pelikula ng may ilan ring antas ng pagbibigay-kahulugan, kaya't naangkop na ihain ang The Learning bilang tekstong makakasangkapan sa pagsasanay sa pagbabasa mula sa iba't-ibang kaparaanan ng pagbibigay hugis sa kaalaman at pagtatagni-tagni ng konteksto. Masasabi namang naiiba ang tabas ng obrang ito sa naunang likha ni Diaz, ang Imelda (2003). Isa sa malaking ambag ng pagkakalikha ng The Learning ang epektibong paggamit nito ng partikular na kakaniyahan at angking ekonomiya ng dokumentaryo bilang natatanging porma ng sining. Napatanyag sa pelikula ang kaangkupan ng pormang ito sa pagdadalumat sa posibilidad ng masinop na pagkukuwento sa maimis na pagkakatahi ng salita at imahe. Idinidikta ng porma na maihatid ang punto ng manlilikha sa pinakamasinop at makasining na paraan.

Panulat At Direksiyon: Ramona S. Diaz
Sinematograpiya: Gretchen Hildebran, Gabriel Goodenough At Miguel V. Fabie III
Musika: Graham Reynolds
Editing: Leah Marino
Produksiyon: CineDiaz, Inc.
Release Date: September 20, 2011

Mapapanood ang The Learning sa pbs.org hanggang ika-20 ng Oktubre