Sa kauna-unahang obra ni Laurice Guillen, kinakitaan na ito ng di mapipintong kahusayan sa paggawa ng pelikula. Mababanaag ito sa umpisa pa lamang ng Kasal? (Trigon Cinema Arts, 1980). Ang lahat ng aspetong teknikal ng pelikula ay kapuri-puri, tanging ang dulang pampelikula lamang ang kakikitaan ng kaunting kahinaan. Kung tutuusin, isa si Mario O'Hara sa mga pinakamuhusay na direktor, manunulat at aktor sa industriya. Mapapansing, maayos ang paglalahad ng istorya sa umpisa ngunit tila napabayaan na ito hanggang sa katapusan ng pelikula. Nagsimula ang Kasal? sa araw bago ang pag-iisang dibdib nina Grace (Hilda Koronel) at Joel (Christopher de Leon). Nalaman natin na kapwa may ibang minamahal ang dalawa. Si Grace ay umiibig kay Ernesto (Jay Ilagan) at asawa ang kapatid nitong si Ellen (Mia Gutierrez). Samantalang si Joel naman ay nagmamahal pa rin kay Lani (Chanda Romero) na isang call girl na binayaran ng kanyang ama (Johnny Wilson) upang iwan nito ang anak. Nakipagkita sina Grace at Joel sa mga tunay nilang pag-ibig nang gabi bago sila ikasal. Ang katanungan kung itutuloy pa ba ng dalaw ang kasal kahit hindi nila minamahal ang isa't-isa?
Dalawang bagay ang naging malaking butas ng iskrip. Una, nakakapagtaka naman na sa dinami-dami ng mga call girls sa kalakhang Maynila ay si Lani pa ang mapipili na maging regalo kay Joel para sa tradisyonal na despedida de soltero. Ikalawa, imposibleng matapos ng ilang taong pagtitiis sa piling ni Ellen na sa dinami-dami ng araw ay pipiliin ni Ernesto ang gabi bago ikasal si Grace upang ipahiwating ang tunay nitong damdamin.. Samakatuwid hindi kapani-paniwala ang naging pagtatapos ng pelikula. Hindi ipinakita sa dula ang relasyon nina Grace at Joel. Gaano ba nila kamahal ang isa't-isa? Bakit may isang tagpo habang nakasakay sila sa kotse ay sinasabi ni Joel kay Grace ang ilang mga simpleng bagay tungkol sa kanya, gayong hindi ba dapat alam na ang mga ito ng dalawang taong malapit nang ikasal? Hindi rin naipaliwanang ang lalim ng pagmamahalang namumuo sa kanila o kahit ang respeto sa tradisyong panlipunan, kung kaya't ang desisyon nina Grace at Joel ay isang malaking kalokohan. Responsibilidad ng isang direktor ang posisyon ng kamera, istruktura ng pelikula at ang pagganap ng mga aktor. Sa mga aspetong ito ay naging matagumpay si Guillen. Mahusay ang sinematograpiya ni Ricardo Remias, orihinal at kakaiba. Nararapat itong papurihan dahil sa masining na pag-iilaw at kompoksisyon ng bawat eksena ngunit ang direktor pa rin ang nagdedesiyon kung saan nakaposisyon ang kamera. Ang istruktura ng pelikula ay nararapat papurihan. Karaniwa'y nakakalito ang mga tagpong may flashback ngunit naipakita ito ni Guillen sa paraang hindi nakakalito sa mga manonood. Naging epektibio ang paggamit nito dahil kung susuriin, nag pelikula ay hindi tungkol sa kasalukuyan, kundi sa koneksiyon nito sa nakaraan.
Sa kanyang paghawak sa mga aktor inilaan ni Guillen ang kanyang buong atensiyon. Napapalibutan ng mahuhusay na pagganap ang Kasal? Tulad ng inaasahan, muling pinatunayan ni Hilda Koronel na isa siya sa mga pinagpipitaganang aktres ng kanyang panahon, ngunit ang isang baguhang tulad ni Mia Gutierrez ay kinakitaan din ng ibayong talino sa pag-arte. Samantalang sa pelikulang ito naipakita ni Christopher de Leon na hindi mapapantayan ninuman ang kanyang kahusayan, ngunit hindi nagpahuli si Jay Ilagan na naghatid ng di malilimutang pagganap. Wala namang itulak kabigin sa husay ni Chanda Romero. Tulad ng ipinamalas ni Maryo J. de los Reyes sa High School Circa '65 (1979), na isinalba ng mahusay nitong direksiyon at Marilou Diaz Abaya sa Tanikala (1980) na may maproblemang iskrip ngunit nararapat papurihan dahil sa talinong ipinamalas ng direktor, sa Kasal? pinatunayan ni Laurice Guillen na kahit maraming kahinaan ang dula na kanyang isinasalaysay, napagtakpan ang mga ito ng ibang aspeto ng pelikulang higit niyang pinagtibay upang makapagdulot ng isang makabuluhang pelikula.
Direksiyon: Laurice Guillen
Dulang Pampelikula: Mario O'Hara
Sinematograpiya: Ricardo Remias
Musika: Jun Latonio
Edting: Efren Jarlego
Disenyo: Mel Chionglo
Produksiyon: Trigon Cinema Arts
6:58 PM
isa ito sa paborito kung movie ni laurice guillen...